“రహీం చాచా?” అంటూ అలాగే పొదివి పట్టుకుని వెచ్చని కన్నీళ్లు చెంపల నుంచి కారుతుంటే “నేను చాచా.. మల్హోత్రాని. రిజ్వానా అక్కతో ఆడుకునే వాడ్ని. గుర్తు పట్టావా?” అన్నాడు.
“బేటా ఎందుకు గుర్తు లేవు.. నీకు ఇష్టమైన మిఠాయి ఇస్తాను తింటావా?” అంటూ చెయ్యి పట్టి తీసుకుపోయాడు.
మల్హోత్రా రహీం వెనకాలే నడుస్తున్నాడు.
కొంత దూరం వెళ్ళాక అక్కడ ఎవరూ లేరని నిర్దారించుకుని సర్రున పక్కకు లాక్కుపోయాడు.
“ఏమైంది చాచా?” అన్నాడు మల్హోత్రా అయోమయంగా.
“బేటా రెండు రోజుల క్రితం ఇక్కడికి ఎవరో వచ్చారు. నీ పేరు చెప్పి నీ కోసం వాకబు చేశారు. ఎవరూ తెలీదు అనేసరికి ఇది నీ స్వస్థలం అని ఇక్కడికి వస్తే ఫోన్ చెయ్యమని నంబర్, నీ ఫోటో ఇచ్చి వెళ్ళారు. ఈ పాటికి నీ గురించి తెలిసిపోయి ఉంటుంది. నువ్వు ఎక్కడికైనా వెళ్ళి దాక్కో” కంగారుగా చెప్తున్నాడు రహీం చాచా.
ఇంతలో దూరం నుంచి టొర్నాడో వస్తున్నట్టు దుమ్ము గాలిలోకి ఎగసిపడుతుంది.
“వౄమ్.. వ్రు…….. మ్” అంటూ కార్లు దూసుకొస్తున్నాయి..
రహీం చాచా తన గదిలోకి తీసుకుపోయి దాచేసాడు. బయటకి వచ్చి షాప్ లో కూర్చున్నాడు.
కార్లు సర్రుమని బ్రేక్ కొట్టి సెంటర్ లో ఆగాయి.
వాళ్ళని అక్కడ ఉండే గురునాథ్ సింగ్ అనే వ్యక్తి వచ్చి కలిసాడు.
“ఎక్కడ ఉన్నాడు?” అని అడిగాడు అక్కడకి వచ్చిన వాళ్ళ నాయకుడు.
అక్కడ దగ్గర్లో ఉన్న గుడిసె చూపించాడు సింగ్.
లోపలికి వెళ్ళి మొత్తం వెతికారు.
ఒక బట్టల బ్యాగ్, కొంత డబ్బు తప్ప ఇంకేమీ లేవు అక్కడ.
బయటకి వచ్చి ఆ గ్యాంగ్ నాయకుడు గర్జించాడు.
“ఎక్కడ్రా ఈ ముసలాడు?”
“ఏమో సాబ్ రాత్రి ఇక్కడే పడుకున్నాడు. ఉదయం ఎటు వెళ్ళాడో తెలీడం లేదు” అన్నాడు వణుకుతూ సింగ్.
వాడ్ని ఒక్క నెట్టు నెట్టి దగ్గర్లో ఉన్న రహీం చాచా దుకాణానికి వచ్చి అడిగాడు.
అప్పుడే రహీం చాచా కూర్చుని ఉన్నాడు.
“తాతా.. ఈ వ్యక్తి ఎటువైపు వెళ్ళాడు?” అడిగాడు.
“ఇతను మా మల్హోత్రా కదూ?” కళ్ళజోడు సరిచేసుకుంటూ అడిగాడు రహీం.
“హా అవును వాడే.. ఎక్కడున్నాడు?”
“ఇంతకు ముందే ఢిల్లీ వెళ్తున్నా అని చెప్పి బయల్దేరాడు. మరి మిగిలిన వివరాలేవి నాకు తెలీదు” అన్నాడు.
ఢిల్లీ వెళ్ళే లోపు మల్హోత్రాని
పట్టుకోవాలని వాళ్ళు వేగంగా బయల్దేరారు కార్లు ఉరికించుకుంటూ.
“హమ్మయ్యా..” అనుకుని రహీం లోపలివైపు మల్హోత్రా ఉన్న గదిలోకి వెళ్ళాడు.
రహీంని చూడగానే మల్హోత్రా కళ్ళు కృతజ్ఞతతో తడిసి ముద్దయ్యాయి.
రహీం కాళ్ళ మీద పడి “మనుషుల్లో మానవత్వం ఇంకా మిగిలే ఉంది అని నిన్ను చూసాక నమ్మకం కలిగింది చాచా. థాంక్స్” అంటూ కన్నీళ్ల పర్యంతం అవ్వసాగాడు.
“పర్వాలేదు బేటా.. ఇప్పుడు ఎలా వెళ్తావు?” అన్న రహీం మాటలకు ఫోన్ తీసుకుని హార్ధిక్ కి కాల్ చేసాడు.
############
జరిగింది విన్న హార్ధిక్ ఒక్క క్షణం ఆలోచించి. “నేను నెక్స్ట్ ఫ్లైట్ కి బయలుదేరి వస్తున్నా. మీరు అక్కడ ఉండద్దు. ఏదైనా వెహికల్ తీసుకుని నోయిడా వచ్చెయ్యండి. జాగ్రత్త. ఎవరి కంటా పడకండి” అంటూ ఫోన్ పెట్టేసి వడివడిగా బయలుదేరాడు టూటూని తీసుకుని.
తన పర్సనల్ ఛాపర్ 2నిమిషాలలో వచ్చేసింది.
అందులో ఎక్కి కూర్చున్నాడు హార్ధిక్. టూటూ దానిని వింతగా చూస్తూ హార్ధిక్ ని అనుసరించి కూర్చున్నాడు.
క్షణాల్లో గాల్లోకి లేచింది ఆ హెలికాప్టర్.
మల్హోత్రా బయలుదేరడానికి సిద్ధమయ్యాడు. రహీం చాచా వచ్చి “ఎలా వెళ్తావు బేటా?” అని అడిగాడు. “బయటికెళ్ళి ఏదైనా వెహికల్ చూసుకుంటాను చాచా” అని చెప్పాడు మల్హోత్రా.
ఈ సమయంలో నువ్వు ఎవరికంటా పడటం అంత మంచిది కాదు అని లోపలికెళ్లి తన కోడలి బురఖా ఒకటి తీసుకువచ్చి వేసుకోమన్నాడు.
మల్హోత్రా మారు మాట్లాడకుండా అందులోకి మారిపోయాడు.
ఎందుకైనా మంచిదని వేసుకున్న షూ విప్పించేసి ఉత్తి కాళ్ళతో వెళ్ళమని ఖాళీ సంచి ఒకటి చేతికిచ్చి తన కొడుకుని పిలిచాడు.
“హా బాబా” అంటూ రహీం కొడుకు ఫైజల్ లోపలికి వచ్చాడు.
“బేటా షాప్ నేను చూసుకుంటూ. నువ్వు ఈ సార్ ని నీ బేగంని తీసుకెళ్తున్నట్టు బైక్ మీద తీసుకెళ్ళి నోయిడాలో దించేసి రా పో” అన్నాడు.
మల్హోత్రా వైపు తిరిగి “నీకు ఆ అల్లా మంచి చేస్తాడు. నువ్వు వెళ్ళిరా బేటా. జాగ్రత్త ” అంటూ సాగనంపాడు.
మల్హోత్రా రహీం చాచా ని గట్టిగా కౌగిలించుకుని “నాకు అంతా మంచి జరిగితే నిన్ను మాత్రం మర్చిపోను చాచా. వెళ్ళొస్తా” అంటూ అక్కడినుంచి బయలుదేరాడు.
మధ్య దారిలో హార్ధిక్ కి కాల్ చేసి రావలిసిన ప్లేస్ చెప్పాడు.
నోయిడా సమీపిస్తుండగా హార్ధిక్ ఛాపర్ ఆగి కనిపించింది మల్హోత్రాకి.
అదిగో అక్కడికే అంటూ వాళ్ళున్న వైపు చూపించాడు ఫైజల్ కి.
ఎక్కడినుంచి వచ్చాయో రెండు కార్లు వాళ్ళకి వీళ్ళకి మధ్యలోకి దూసుకొచ్చాయి.
వాటిలోంచి సాయుదులైన పదిమంది కిందకి దూకారు.
హార్ధిక్ ఒక్క క్షణం నిశ్చేస్టుడైనా వెంటనే తేరుకుని లోపలనుంచి రెండు గ్రనేడ్లు విసిరి వాళ్ళ కార్లను ధ్వంసం చేసాడు.
ఈ సారి బిత్తరపోవడం వీళ్ళ వంతయ్యింది.
ఆ పేలుడుకు లోపల ఉన్న ఇద్దరు డ్రైవర్లు, బయట వాళ్లలో నలుగులు శవాలుగా మారారు.
క్షణం ఆలస్యం చేయకుండా టూటూ వాళ్ళ మీద విరుచుకుపడ్డాడు.
చూస్తుండగానే ఒకడి మెడ విరిచేసాడు. అక్కడున్న కత్తి విసరగానే ఇంకొకడి గొంతులో దిగి ప్రాణాలు గాల్లో కలిసిపోయాయి.
ముందు జాగ్రత్తగా బుల్లెట్ ప్రూఫ్ వెస్ట్ వేసుకోవడం వల్ల హార్ధిక్ కానీ, టూటూ కానీ వాళ్ళకి పెద్ద భయపడే అవసరం లేకపోయింది.
మల్హోత్రా, ఫైజల్ బండి వెనకాల దాక్కుని ప్రాణ భయంతో బిక్కుబిక్కుమంటూ కూర్చున్నారు.
హార్ధిక్ తన గన్ తో ఇద్దరి శరీరాల్ని ఛిద్రం చేసేలోపు టూటూ మిగిలిన వారి పరలోక ప్రయాణానికి టిక్కెట్లు తత్కాల్ లో బుక్ చేసేసాడు.
“మల్హోత్రా… మరేమీ భయం లేదు. యూ ఆర్ సేఫ్ నౌ.” అంటూ భుజం మీద చెయ్యి వేసి పైకి లేపాడు హార్ధిక్.
మల్హోత్రా అప్పటికే చెమటలతో ముద్ద అయిపోయాడు.
ఫైజల్ కి నాలుగు కట్టలు డబ్బు ఇచ్చి మల్హోత్రాని తీసుకుని బయలుదేరాడు హార్ధిక్.
###############
ఇంటికి వచ్చే సరికి ఛటర్జీ చేతులు వెనక్కి విరిచి కట్టేసి, మోకాళ్ళ మీద కూర్చోబెట్టి ఉంచారు. వాడి వెనకాల ఆ పదిమంది అడవి జంతువుని చంపేసి ఫోటో కి ఫోజ్ ఇస్తున్నట్టు నుంచున్నారు.
వాళ్ళకి అక్కడక్కడా గాయాలు అయ్యి, బుల్లెట్లు తగిలి శరీరం రక్తం కారుతుంది.
అయినా వాళ్ళు అదేమీ పట్టించుకునే పరిస్థితుల్లో లేరు. మామూలుగానే ఉన్నారు.